我部東芝 Tecra 手提電腦的電池老化左,
11月7號帶埋部電腦帶埋舊電去灣仔電腦城夾價,
行左幾間, 見到xbooktechnology最平, (而且我之前都搵佢地整過呢部機)

我於是就俾錢買, $750 OEM Toshiba PA3285U (單上係咁寫)

劉小姐(店員, 後來知道係店的經理)話俾卡要收手續費,
不過如果我一次過俾晒就唔收,
我見都係幾百蚊, 仲特登落樓下渣打提款機攞cash俾佢,
唔駛佢蝕手續費, 單Number 4202
佢話第二日有貨, 不過我唔得閒, 於是11月10號去攞,
去到發現舊電唔係東芝, 原來係叫代用電/水電,
佢地話無問題 (但是我買的時候無人同我講佢地個價錢平d係因為係代用電價),
咁唔買都買左,返到屋企咪裝返落部機到charge電,
係控制台睇到佢charge緊電,
charge 到100%之後我就拔除AC power,
點知部機即刻熄
於是我上番去搵佢地, 佢地話肯換俾我
我唔多識電腦的野,
行過樓下有線寬頻的哥哥同佢傾左兩句, 佢叫我最好唔好用代用電
(哥哥都未知有線投到英超, 我11月10號行過佢問我裝唔裝有線睇世界盃,
我仲問佢$3000睇兩個月有線佢公司劑唔劑, 因為驚睇完cut唔到)
於是我又打去問可唔可以補錢換番舊原裝電池,
後來佢地話原裝電無貨, 最後都無講實會點

劉小姐都唔算衰, (可能我幫襯過啦), 佢叫我下次記得帶埋部notebook黎charge電,
charge到先走, 我原本打算上星期六去,
不過我住得遠, 呢幾日又忙, 最後今日先去到,
一入到去有個長頭髮的型男就已經惡形惡相,  
我同佢講係舊電唔得我先再黎, 我都唔係好得閒的人,
佢叫同事攞左舊電黎(佢地好似係二樓有另外一間鋪),
放左落部機到, 駁好AC電, 部機連著都著唔到,
佢同事攞番舊電出黎, 直接駁AC電部機就著, (即係唔關我部機事啦)
型男又話要再訂, 叫我返屋企等電話,
咁啱我又睇到佢舊電寫適合的Model No. 同我部機有d唔同 (後來佢地解釋話呢個應該唔係唔用得的原因)

我話咁我一係補錢要原裝電, 一係你計番我行政費($50-100),
你退錢俾我, 我去第二間買啦, 無理由連續兩舊電都唔得,
我又等住用, 第三舊如果又唔得咁點?
型男就好唔滿意咁話佢唔知幾時先有原裝電, 又唔肯退錢, 淨係叫我返屋企等電話
咁我話你打俾你老闆問下啦,
佢話佢都好耐無見過佢老闆,
我問佢咁你點出糧呀?
型男就好型咁話自己係自動轉賬
咁我心諗, 你又話唔到事, 又唔肯打電話, 淨係要我番屋企等,
我又等住用, 咁我再問佢我等到第三舊如果又唔得咁點?
佢就好惡咁話佢唔會回答假設性問題, (嘩, 而家型男當自己係曾特首嗎?)

我話咁我唯有搵消委會, 型男就話搵消委會都係side你自己時間

我打去消委會, 等左好耐都係音樂, 我唯有留言,
跟住我再打去1823, 個接線生好耐心聽我的訴求,
然後建議我報警,
仲俾埋灣仔警署的電話我,

警察黎到(一個男警一個女警), 我就好激氣咁講啦,
阿sir就好野, 一入到去講左幾句, 就搵到老闆的劉小姐 (但是後來黎補鑊的店員話劉小姐都係打工),
叫我直接同劉小姐講,
我其實都唔想搞到報警,
既然而家一個電話就搵到佢,
型男之前打個電話咪得lor,
我聽電話之前就同佢講 (當然就係好激氣咁講):「又話搵唔到老闆?」
阿型男就當住警察面講 x 你老母H呀, 你老母而家企係到都係俾我x 咋
(第二句我真係唔係記得好清楚,我真係未聽過有人咁樣鬧人, 但是都係類似呢種說話),
我好激動同警察講, 型男就好型咁話「點呀, 我又無犯法」,
阿sir又叫我一人小句,
我覺得好唔合理, 我同阿sir講, 而家係佢鬧我阿媽先wor, 阿sir又依依哦哦,
我就嬲到話「信唔信我當住差人面打你呀?」,
佢就好得戚咁話打我啦打我啦
於是Madam就叫我出番去係走廊勸我, 我同Madam講, 「我都係人, 我都有情緒wor」
警察最後就勸掂雙方啦,
鋪頭方面亦派另一個人黎處理,
型男就行出黎, 係走廊鬧我, 「做咩呀, 你阿媽唔係俾人x邊到有你呀?」
明明係呢間鋪一舊電都搞唔掂, 我連解決方法都幫你地諗埋,
我咪鬧番佢lor , 「不該(我當時當然唔係講國語), 我係試管嬰兒呀，我而家就叫我阿媽黎」
Madam都勸我唔好, 但是鋪頭方面又肯全數退錢, 連行政費都唔扣,
而我今朝出門口漏左第一舊電係屋企, 我阿媽唔想夜長夢多於是都特登搭車出來...

之後我阿媽陪我上去, 有個男仔就好好禮貌係咁道歉, 仲退番晒錢...

我寫出黎一黎想大家評下理, 我先講明, 我的電腦知識好少, 所以以上有高手見到覺得好笑要多多包涵,
而且而家仲係好嬲, 如果今日有目擊者記得d對白有d出入, 麻煩話番俾我知,

如果大家覺得我應該唔出聲返屋企等電話或者點樣可以處理得好d, 亦歡迎指出, 等我以後學精d,


多謝先

p.s. 同埋係google發現呢間鋪頭原來唔係第一次俾人寫佢地的服務質素上網, 於是決心寫埋出黎, 等多d人有所警惕

poor guy\\

"之後我阿媽陪我上去, 有個男仔就好好禮貌係咁道歉, 仲退番晒錢..."

傻仔,仲要亞媽同你上去........俾人攞彩仲攞唔夠?

"我就嬲到話「信唔信我當住差人面打你呀?」,"

傻仔,亞型男一話驚你就俾人拉得,罪名係刑事恐嚇。人地講粗口唔犯法，一係就唔出聲，你唔抵得就話番佢，但最終都係一套鬧劇。

咁簡單既事又報警，明知係消委會既事咪事後再投訴咯。不過消委會處事都係粗製濫造，人少投訴多。最好係FORUM講出泥大家知道避免上當。